مذكرات فنان شقط بادى من الصفر

طريقة تفكير البرنس فى التظبيط - النص التانى

2007-10-02T16:22:00.000-07:00

طريقة تفكير البرنس فى التظبيط - النص الاول

2007-09-14T05:07:00.000-07:00

التفكير الخرفانى فى التظبيط

2007-08-30T07:44:00.000-07:00

ليه انتا محتاج تتعلم التظبيط

2007-08-11T02:38:00.000-07:00

48 قانونا للصياعة جزء 4

2007-07-25T00:01:00.000-07:00

القانون سبع وتلاتين: اخلق مشاهد جذابة

اللوحات الجذابة والحركات الكلاس اوى بتدى هالة من القوة, كل الناس بتنبهر بيهم. اخلق مشاهد للناس الى حوليك مليانة بحجات مبهرة ورموز قوية علشان تعلى الحضور بتاعك عندهم, من كتر ما هما مبهورين بالمشهد ده صعب يخدو بالهم انتا بتعمل ايه بجد – من وجه نظرى ده السبب الى بيخلينا نحب نجوم السينما رغم البلاوى السودة الى بيعملوها.

القانون تمنية وتلاتين: فكر بالطريقة الى تعجبك لكن اتصرف زى غيرك

لو مثلت فيلم انك ماشى ضد التيار, وعمال تتفشخر بافكارك الغريبة وطرقك الى موش متعارف عليها, الناس هتفتكرك عاوز تلفت انتباهم بس و تحسسهم انك احسن منهم. هيلاقو طريقة يعاقبوك بيها علشان حسستهم بالنقص. خليك فى الامان اندمج مع الناس وركز معاهم فى التجاارب المشتركة بينكم. شارك تميزك عن غيرك ده مع اصحابك الى دماغهم كبيرة والناس الى اكيد هيعرفو قيمة كلامك الجديد ده – موش اى حد من معارفك تقولو على الموقع ده مثلا, هتلاقى الف واحد دماغهم صغيرة وموش عارفين هدف الموقع بجد.

القانون تسعة وتلاتين: حرك الميه علشان تصاد السمك

الانفعال والمشاعر المبالغ فيها دايما بيقو ضدك. لازم تفضل دايما هادى ولك هدف. لكن لو خليت اعدائك ينفعلو وانتا اعصابك بارده, انتا كده كسبت الموقف. خل توازن اعدائك, دور على الشرخ الى فى كبريائهم اللى ممكن تهزهم بيهم, كده يبقا انتا كده كسبت الموقف وبقو زى الشخشيخة فى ايدك.

القانون اربعين: احتقرالغدوة الى ببلاش

الحاجة الى بتتقدملك ببلاش ممكن تكون خطر ليك, غالبا بيكون ورها خدعة اوى جميل هيطلب منك قدام. الحاجة اللى ليها قيمة تستاهل يدفع فيها. لما بتصرف على نفسك بتبعد نفسك من الشعور بالجميل لحد والاحساس بالذنب والخديعة. من الحكمة برده تدفع تمن الحاجة كله, مفيش حمرقة مع النجاح والتفوق. خليك كريم بفلوسك وعلطول جيبك عمران, الكرم دليل على القوة والسيطرة – معظم الناس الناجحه ابتدت من الصفر وكونت نفسها بنفسها.

القانون واحد واربعين: اوعى تحاول تملى مكان شخصية مهمة

الحاجة اللى بتحصل الاول دايما بتبان احسن وفريدة من نوعها اكتر من اى حاجة بتيجى بعديها. لو جيت ورا مكان شخص جامد او ابن حد مشهور, لازم مجهودك يبقى مضاعف عشان تبان احسن منهم. اوعى تتوه فى ضلهم, او تددفن فى ماضى هما الى عملوه, ميز نفسك وشخصيتك, اتبع اسلوب وطريقة جديدة. قلل من شأن اللى قبليك واكسب القوة والسلطة عن طريق التميز والتجديد فى الطريقة بتاعتك انتا.

القانون اتنين واربعين: اضرب الراعى والغنم الى حوليه هيتفرق

اى مشكلة لما يتمشى وراها بتوصل لشخص واحد قوى بيكون هو السبب فيها, بيكون مثير للبلبلة او واحد كحيان بس مغرور او سفير للنوايا الحسنة. لو سبت النوعية ديه من الناس تتعامل, هيجذبو ليهم ناس كتير, اوعى تستنى لما المشكلة تكبر او تحاول تتفاوض معاهم, موش هتعرف تتشريهم. اتخلص من تاثيرهم فى الناس عن طريق عزلهم او نفيهم. اضرب مصدر المشكلة والغنم هيتفرقو

القانون تلاتة واربعين: اشتغل على قلوب وعقول الناس

لما بتجبر الناس على حاجة بالقوة هتعمل رد فعل فى الاخر هينفخك انتا, اجذب الناس وخليهم هما الى يعوزو يمشو فى سكتك. الشخص الى بتجذبه ليك هيبقى خادم مخلص ليك. علشان تجذب الناس ليك اشتغل على نفسيتهم ونقط ضعفهم. اضعف مقاومتهم ليك, العب على مشاعرهم والحاجت الى تهمهم والحجات الى بيخافو منها. تجاهل قلوب وعقول الناس يبقى اكيد هيكرهوك جدا.

القانون اربعة واربعين: جرد الاسلحة واحرق الدم, خليك مراية

المراية بتعكس الواقع, بس هيا احسن طريقة للخداع برده, لما بتقلد اعدائك, وبتعمل زى ما هما بيعملو بالظبط, موش هيعرفو خطتك. اسلوب المراية ده هيئلس عليهم ويحرق دمهم, هيخليهم يخرجو عن شعورهم. لما بتبقى مراية تعكس نفسيتهم, هتغويهم بوهم انك بتشاركهم فى مبدائهم, ولما بتبقى مراية بتعكس افعلاهم, بتعلمهم درس, نادرة اوى الناس الى بتعرف تقاوم اسلوب المراية ده.

القانون خمسة واربعين: اقنع الناس بالتغير, بس اوعى تحاول تغير فيهم كتير فى وقت قليل

كل الناس فاهمة اهمية التغيير والتجديد فى حياتهم, بس لو بصيت عليهم يوم ورا التانى هتلاقيهم عبيد للعادات بتاعتهم. لو زودت عيار التجديد عليهم هتخلق مصيبة سودة, وفى الاخر هيتفرعنو عليك. لو انتى لسا واخد وضع قوة جديد, او دخيل عاوز تعمل جماهرية ليك, اعمل نفسك بتحترم الطرق القديمة الى كانو ماشين عليها, لو التغير ضرورىو خليهم يحسو انه تطور طبيعى للحورات القديمة.

القانون ستة واربعين: اوعى تبان مفكش غلطة

لو بنت احسن من الناس بتحط نفسك فى خطر كبير, والاخطر من كده انك تبان من غير غلطات او نقط ضعف. الحقد بيخلقلك اعداء بس مسكرتين عليك. من الذكاء ان من كل فترة للتانية تبين بعض العيوب وتتعرف ببعض العادت الى دمها تقيل شوية فيك, علشان تشيل الحقد من قلوب الناس وتبان بنى ادم طبيعى زيهم وتشجعهم يقربو منك. الكمال لله وحده

القانون سبعة واربعين: اوعى تكمل فى سكة توصلك للهدف بتاعك بعد ما تحققه, لما تنتصر اعرف ازاى تفرمل نفسك

لحظة الانتصار غالبا لحظة حرجة جدا. فى غمرة الفرحة بالنصر الغرور والثقة المبالغ فيها بنفسك ممكن تدفعك بعيد عن الهدف بتاعك, لانك لما تزودها, بتخلق ليك اعداء اكتر من اللى انتا هزمتهم دلوقتى. متخليش النجاح يلعبلك فى دماغك. مفيش بديل للتخطيط وحساب الخطوات. حط هدف لنفسك ولما توصل ليه فرمل نفسك.

القانون تمنية واربعين: متخليش لنفسك شكل محدد

لما بتعمل لنفسك شكل معين, وعامل خطة واضحة لغيرك, بتبقى معرض للهجوم. بدل ما تخد تيمة معينة ممكن اعدائك يفهموها, خليك مرن وعلطول فى تجديد. تقبل الحقيقة ان مفيش حاجة اكيدة مية فى المية ومفيش قانون ثابت. احسن طريقة تحمى بيها نفسك انك تبقى مرن جد وملكش شكل محدد زى المية, اوعى تعتمد على الاستقرار او الروتين الثابت. دوام الحال من المحال وكل حاجة بتتغير.

48 قانونا للصياعة جزء 3

2007-07-17T12:21:00.000-07:00

القانون خمسة وعشرين: عيد اكتشاف نفسك

اوعى تقبل القوانين والاسطمبات الى بيحطك فيها المجتمع والناس الى حوليك, عيد اكتشاف نفسك, طور شخصية جديدة بتلفت الانتباه ومستحيل الناس تزهق منها. خليك مسيطر على الصورة بتاعتك الى بتظهر بيها قصاد الناس, اوعى تخلى الناس تحددها ليك وتحطك فى قالب معين, خلى فى شوية دراما فى وقفتك وتصرفاتك وانتا بره البيت, قوتك الشخصية هتتحسن كتير وشخصيتك هتبان جامدة اوى ومفيش حاجة فى الدنيا تعرف تكسرك.

القانون السادس والعشرين: دايما خلى اديك نضيفة

لازم تبان قصاد الناس مثال يحتذى بيه فى التحضر والكفاءة, ايدك عمرها متوسخت بالغلطات والحركات الواطية. تقدر تحافظ على الصورة المثالية الى موش قيها نقطة سودة بانك تخلى الناس التانية كبش فدا تستخدمهم علشان يعملو الشغل القذر ده بدالك, وتفضل محافظ على صورتك قصاد الناس.

القانون السابع والعشرين: العب على وتر رغبة الناس انها تصدقك, هيفضلو طول عمرهم يمشو رواك

الناس عندها رغبة ملحة انها تصدق وتعتقد فى حاجة معينة, استغل الرغبة القوية الى عندهم ديه, اديهم هدف جامد وطريق يمشو فيه علشان يحققو الهدف ده, خلى كلامك غامض بس مليان بالوعود, ركز على الحماس اكتر من المنطق والتفكير العقلانى. ادعى التابعين بتوعك طقوس يمارسوهاو خليهم يضحو بحجات علشان خاطرك. اعتقادهم الجامد فيك واقتناعهم بهدفك هيحط فى ايدك سيطرة موش ليها حدود.

القانون التامن والعشرين: خش على المعركة بجراءة

لو انتا موش متاكد تصرفك هيوصلك لفين بالظبط, متقولش هاحول وخلاص, الشك والتردد هيضعفو عزيمتك لما تجى تنفز وتنجز. اهتزاز الشخصية خطر جدا عليك, الاحسن ليك فى الحالة ديه تخش بجراءة. اى غلطة هتعملها نتيجة الجراءة تقدر تصلحها بجراءة اكتر منها. الناس كلها بتحب الراجل الجرىء, محدش بيفتكر المهزوزين.

القانون التاسع والعشرين: خطط الطريق الى هتمشى فيه من اوله لاخره

النهاية هى كل حاجة, خطط طريقك كله لغاية عندها, حط فى اعتبارك كل التوابع الممكنة لتصرفاتك, المشاكل, والتربات الى ممكن تحصل وتضيع مجهودك كله وتخلى الصيت كله يروح لغيرك. لما تخطط لحد النهاية, عمر ما الظروف الى حوليك هتلخمك وهتعرف انتا مفروض تقف امتا. براحة وجه الحظ ناحيتك وتوقع المستقبل كل ما انتا تفكر وتبص لقدام اكتر.

القانون التلاتين: دايما بين للناس ان انجزاتك ديه بتعملها من غير تعب خالص

تصرفاتك لازم تبان طبيعية جدا وبتعملها بمنتهى السلاسة. كل التعب والتدريب الى انتا عملتهم, كل الحيل الذكية, كل ده لازم تخبيه عن عيون الناس. لما تتصرف, اتصرف بسلاسة وكانك ممكن تدى اكتر من كده, اوعى تقع فى فخ الفشخرة الكدابة وتعرف الى حوليك انتا بتتعب فى الشغل قد ايه, هتجيب شوشرة موش ليها لزمة لنفسك. متعلمش حد الحيل بتاعتك علشان وارد اوى انهم يعملوها فيك.

القانون الواحد وتلاتين: اتحكم فى الاختيارت المتاحة للناس, خليهم يلعبو بالكروت الى انتا مديها ليهم بس

احسن انواع الخداع الى بتبان فيها انك بتدى الطرف التانى حرية الاختيار, الضحايا بتوعك هيحسو انهم متحكمين فى الموقف, بس فى الواقع هما عرايس بتلعبها بايدك. اديهم الاختيرات الى كلها هتبقى فى صالحك مهما نقوا اى حد فيهم. اجبرهم على انهم يختارو الاخف من تربين, الاتنين بيكونو فى صالحك. حطهم على مفترق طرق وكل طريق فيهم العن من التانى. فى الحالتين هما الى خسرانين.

القانون التانى وتلاتين: العب باحلام الناس

الناس بتهرب من الحقيقة علشان مرة وبتوجع القلب. اوعى تجبر الناس على مواجهة الحقيقة والواقع لو عملت كده توقع منهم القرف والكره لسيادتك علشان فوقتهم من الحلم الجميل الى كانو عايشين فيه. الدنيا قاسية وكلها ضغوط علشان كده الناس الى بتخلق الرومانسية والاحلام الوردية بتبقى زى الواحة الى فى قلب الصحرا, كل الناس بتجرى عليها. فى قوة وسيطرة جامدة اوى فى اللعب باحلام الناس.

القانون التالت وتلاتين: اعرف الصمولة الى فاكة فى الشخص الى قصادك

كل واحد عنده نقطة ضعف, شق فى جدار قلعته. نقطة الضعف ديه بتبقى شعور بالنقص, مشاعر موش بيعرف يتحكم فيها او احتياج لحاجة معينة, ممكن تكون حاجة معينة بتبسطه بس خايف الناس تعرفها عنه. فى جميع الاحوال اول ما تكتشفها, هتيقى صمولة فاكة فيه ممكن تلعبلو فيها لمصلحتك الشخصية.

القانون الرابع وتلاتين: خليك برنس فى الستيل بتاعك, اتصرف زى الملوك علشان تتعامل زيهم

الصورة الى بتبين نفسك بيها للناس غالبا بتحدد الطريقة الى هيعاملوك بيها, على المدى الطويل لو انتا كان الستيل بتاعك مستفز او عادى زى بقية الناس الكلام ده هيخلى الناس موش تحترمك. الملك بيحترم نفسه وده بيشجع الناس ويوحى ليهم بنفس الشئ ناحيته. لو كنت برنس فى تصرفاتك وواثق من امكانياتك. هتخلى نفسك تبان للناس كانك برنس مستنى يلبس التاج بتاعه.

القانون الخامس وتلاتين: احترف استخدام فن التوقيت الصح

اوعى تبان انك مستعجل, الاستعجال بيبين للناس قد ايه انتا موش عارف تتحكم فى نفسك او فى الوقت بتاعك. دايما خليك صبور كانك متوقع ان كل حاجة هتجيى لغاية عندك. عود نفسك على اكتشاف اللحظة المناسبة, خليك واعى ومدرك للى بيحصل حواليك وايه المواقف الى هتجبلك قوة وسيطرة. اتعلم تتقل لما يكون الوقت موش مناسب ولما تيجى اللحظة الحاسمة اهجم بكل قوتك.

القانون السادس وتلاتين: احتقر الحجات الى موش تعرف تطولها, الطناش ليهم بيبقى احسن انتقام

لما بتهتم بمشكلة صغيرة بتديها قيمة ولزمة. كل متهتم بعدوك اكتر, كل ما تخليه اقوى, والغلطة الصغيرة بتكبر وتبان اكتر لما بتحاول انتا تلصحها. سعات بيقى احسن حاجة انك تسيب كل حاجة فى حالها. لما تكون حاجة نفسك فيها وموش هتطولها, بين احتقارك ليها كل متقلل اهتامك بيها, كل ما هتبان برنس اكتر.

48 قانونا للصياعة الجزء التانى

2007-06-28T03:16:00.000-07:00

القانون التالت عشر: لما تعوز مساعدة من الناس العب على وتر المنفعة الشخصية ليهم موش عطفهم او كرمهم

لما بتدور على حد يساعدك, متوجعش دماغه بالجمايل وحركات الجدعنة الى عملتها معاه زمان. هيلاقى الف طريقة ينفضلك بيها. بدل ما تعمل كده دور على حاجة فى طلبك منه هتنفعه وتفيده, وركز كلامك كله عليها وعيشه الوهم, اكيد هيوافق وش ويكون فرحان كمان علشان هو شايف انه هيستافاد

القانون الرابع عشر: بين نفسك ليهم كصديق لكن اشتغل معاهم كجاسوس

مهم اوى تكون عارف كل حاجة عن المنافسين بتوعك, خلى ليك عيون تجبلك قرارهم علشان تفضل متفوق عليهم. او جمع المعلومات بنفسك. لو تقابلهم بصفة رسمية, اعرف ازاى تجرجرهم فى الكلام, اسئل بطريقة غير مباشرة علشان تعرف نقط ضعفهم ودوافعهم. مفيش فرصة متنفعش تكون مناسبة للتطقيس.

القانون الخامس عشر: دمر اعدائك تماما

كل القادة العظام على مرمى التاريخ عرفو ان العدو الى انتا خايف منه لازم تدمره تماما "هما اتعلمو الدرس ده بعد ما خدو على دماغهم كذا مرة", لو جمرة واحدة صغيرة فضلت مولعة, هتلاقيها بقت حريقة بجد بعد فترة, الخسارة بتبقى كبيرة لما توقف عدوك فى نص مشواره عن تدميره كليا, لانه فى الحالة ديه هو هيقوم على رجليه تانى وينتقم منك. دمر ليه نفسيته موش صحته.

القانون السادس عشر: غيب عليهم من فترة للتانية علشان تعلى قيمتك وبرستيجك

اى حاجة تكون متوفرة اوى بتقل قيمتها, كل ما الناس بتشوفك وتكلمك كل ما تبان بنى ادم عادى بالنسبة ليهم, لما تكون عضو فى مجموعة, لو قعدت مختفى فترة الناس هتتكلم عليك وتوحشهم اكتر. اعرف امتا تختفى. على قمتك بعدم التواجد الدائم.

القانون السابع عشر: خلى الى حواليك فى حالة قلق دائم, خليك غير متوقع الى حد ما

احنا كبشر عادتنا بتحكمنا وبنحب اوى نشوف الناس الى حولينا بتتصرف زينا, لما تكون انتا متوقع فى تصرفاتك ده بيديهم احساس بالامان. اقلب الترابيزة عليهم, تصرف مطرقع ملوش هدف هيخليهم يهنجو منك, ويقعدو يجبو دماغهم يمين وشمال علشان يلاقو تفسير للانتا عملته ده, بس خلى بالك لو زودت فى الحركة ديه هيتنخنقو منك ويقلقو منك موت.

القانون التامن عشر: اوعى تبنى قلعة بينك وبين الناس علشان تحمى نفسك, العزلة خطر جدا

الدنيا خطيرة والناس الى غاوية شر موجودة فى كل حته, كل واحد لازم يحمى نفسه, العزلة ممكن تبان فى الاول ائمن حاجة ليك بس بالعكس هيا بتاذيك اكتر ما بتحميك, انتا كده بتحرم نفسك من خبرات وتجاارب مهمة, وهتبقى غلبان وصيدة سهلة, احتك بالناس كون علاقات, هيحموك ويوعوك من الناس الشر.

القانون التاسع عشر: اعرف انتا بتتعامل مع مين, اوعى تهاجم الشخص الغلط

الناس اشكال والوان فى الدنيا ديه, اوعى تفكر ان كل الناس هتصرف بنفس الطريقة لما تتعامل معاهم. انصب او قرطس بعض الناس هيفضلو طول عمرهم يجرو وراك علشان يتنقمو منك. الناس ديه بتبقى ديابة لابسة فرو خروف. اختار ضحايك و اعداءك بحذر وحكمة, وبعد كده اوعى تعض او تخدع الشخص الغلط

القانون العشرين: اوعى تنحاز لحد

العبيط بس هو الى بيجرى وينحاز لحد ضد التانى. اوعى تنحاز لحد غير نفسك. طول منتا مستقل بذاتك, هيبقا ليك سيطرة على غيرك. وقع الناس فى بعضهم وهما يجرو وراك

القانون الواحد وعشرين: اعمل عبيط علشان توقع واحد عبيط, دايما بان للناس انك اغبى مقارنة بمستواك الى انتى بس عارفه

مفيش حد بيحب يبان اغبى من الناس التانية. الفكرة انك تخليهم يحسو انهم عباقرة وازكى منك بمراحل كمان. لما يقتنعو بكده عمرهم ما يشكو ان عندك دافع خفى من ورا ده كله

القانون الاتنين وعشرين: استخدم حيلة الاستسلام, حول ضعفك لقوة

لما تكون ضعيف اوعى تعمل عنتر, احسنلك تستلم فى الحالة ديه. الاستسلام هيديك الوقت علشان تجمع نفسك تانى, وقت علشان تعذب وتخنق الى هزمك, وقت لحد ما يبتدى يضعف. اوعى تسمح ليه يفرح بشابه علشان حاربك وعرف يهزمك, استسلم انتا الاول, حركة زى ديه هتحرقله دمه وموش هتخلى ناره تبرد. خلى الاستسلام وسيلة لكسب القوة

القانون التالت وعشرين: ركز قوتك وطاقتك

حافظ على قوتك وطاقتك عن طريق انك تخليها دايما متركزة عند اقوى نقطة فيها. انتى بتكسب اكتر لما بتلاقى منجم مليان دهب وتفضل تحفر فيه اكتر, بدل ما تفضل تنطط من منجم ضحل للتانى, التركيز بيكسب التعدد كل مرة. لما بتدور على مصدر قوة يعليك, دور على شخصية واحدة بس تكون جامدة موت, البقرة المربربه الى هتفضل تديك لبن لاطول فترة ممكنة

القانون الرابع وعشرين: عيش دور الشخصية اللبقة موت

الشخصية البقة موت بيلاقى نفسه فى العالم الى بيدور حولين القوة والشطارة. هو استاذ فى اللف والدوران, بيجامل ويقدر رؤسائه, بياكد على وجه نظره وسلطته بطريقة سلسه وغير مباشرة. اتعلم وطبق قوانين اللباقة وسعاتها موش هيبقى فى حد للمستوى الى ممكن توصل ليه فى القوة والسيطرة

48 قانونا للصياعة

2007-06-19T10:54:00.000-07:00

القانون الاول: اوعى تسرق الاضواء من الريس بتاعك

دايما خلى الى اعلى منك مطمنين من انهم احسن منك. بمعنى انه موش علشان تبسطهم وترضيهم تزودها فى استعراض مهارتك علشان كده انتا هتوصل معاهم للعكس, هتخليهم يقلقو منك ويحسو بالنقص. كل ما تحسسهم اد ايه هما جامدين كل ما انتا هتعلى فى نظرهم.

القانون التانى: متحطش ثقة اكتر من حدها فى اصحابك واتعلم ازاى تستفاد من اعداءك

خلى بالك من اصحابك, مكن يكونو اول ناس يخنوك علشان هما ممكن يغيرو منك بسهولة. هما ممكن سعات مدلعين ومستبدين فى قرارتهم معاك, لكن لو رجعت تتعامل مع واحد افشت عليه زمان هيبقى مخلص ليك اكتر من صاحبك, علشان فى حجات كتير هو لازم يثبت ليك انها اتغيرت فيه, الخلاصة حرص من اصاحبك اكتر من اعداءك, لو انتا موش ليك اعداء دلوقتى, اخلق شوية هينفغوك قدام

القانون التالت: خبى دوافعك

خلى الناس فى حيرة وبعيد عن النور, بمعنى انك عمرك ما تقول ايه هو الهدف من تصرفاتك. طول ما هما موش عارفين انتا ناوى على ايه, موش هيعرفو يحضر دفاع او رد فعل. توهم وخليه يفكرو فى الاتجاه الغلط. لما يجى الوقت الى يفقسوك يكون الوقت ده متاخر اوى

القانون الرابع: دايما اتكلم اقل من الازم

لما تحاول تبهر الناس بكلامك, كل ما ترغى وتلك وتعجن اكتر كل ما تبان انك شاب عادى فى نظرهم, وبيقل تحكمك فى الموقف. حتى لو كان الحوار الى بتحكى فيه غريب. هيبان الذ بكتير طول منتا مخلى الموضوع غامض ونهايته مفتوحه ويحير حبتين. الشخصيات القوية بتبهر الناس بكلام قليل بس تقيل. كل ما ترغى اكتر كل ما بيزيد الاحتمال انك تعك

القانون الخامس: حجات كتير معتدمة على سمعتك وبرستيجك, احميهم باى طريقة

البرستيج هو اساس قوة الشخصية, عن طريقة السمعة بس ممكن تكسب فى مواقف كتير, لكن لو سمعتك بقت فى الارض, موقفك هيبقى ضعيف وهتلاقى الف كلب بيحاول يعض فيك. احمى سمعتك بجدار من فولاذ. خليك صاحى لاى محاولة ولو صغيرة لتضيع البرستيج بتاعك وافكسها قبل ما تكبر. فى نفس الوقت اتعلم ازاى تشيل اعداءك من الصورة عن طريق فتح اخرام صغيرة فى سمعتهم, بعد كده اقف بعيد وخلى الناس هيا الى تسلخ فيهم

القانون السادس: خليك ملفت للانتباه تحت اى ظرف

معظم الناس بتحكم بالمظهر, الى حاجة الى موش بتبقى واضحة بتطير من الحسبان. اوعى تخلى نفسك تتوه فى زحمة الناس. ميز نفسك وخليها ملفتة للانتباه, خلى عيون الناس عليك, امشى فارد صدرك, لبسك جرىء حبتين, عامض شوية موش زى بقية الناس

القانون السابع: خلى الى حوليك يعملو ليك الشغل بتاعك, بس انسب الفضل كله ليك

استخدم حكمة وخبرة ومجهود الناس الى حوليك لتحقيق اهدافك انتا, لانك لو عملت كده موش هتوفر وقتك ومجهودك وبس, دا نتا كمان هتبان كانك معدى جدا فى المهارة وسرعة الانجاز. فى الاخر الى ساعدوك هايتنسو وانتا بس الى الناس هتفتكرك. اوعى تعمل حاجة بنفسك طول ما فى حد غيرك ممكن يعملها ليك.

القانون التامن: خلى الناس هيا الى تيجى ليك, عشمهم بحاجة لو كان ضرورى

لما بتجبر حد تانى هو الى يتصرف, بتبقى انتا متحكم فى الموقف. الاحسن دايما انك تخلى عدوك هو الى يجى لعندك, وينسى مصالحه هو. عشمه واقنعه انه مصلحته معاك, بعد كده اتحرك ضده. الكروت كلها بقت فى ايدك انتا

القانون التاسع: اكسب بافعالك وتصرفاتك موش بالجدل وكتر الكلام

اى انتصار لحظى انتا حققته فى جدل او نقاش هو فى الحقيقة انتصار وهمى: الكره والرفض لشخصك الى حصل نتيجة كده هيعلم فى دماغ الناس دول اكتر من اى تغير مؤقت فى وجهة نظرهم. تاثيرك على الناس اقوى لو خلتهم يتفقو معاك فى الراى لما يشوفو افعالك, من غير متقول ولا كلمه. وريهم طريقتك شغالة ازاى موش تعد تديهم محاضرة

القانون العاشر: ابعد عن الناس الكئيبة و النحس ممكن يعدوك

بسهولة ممكن يتقضى عليك من كائبة واحد انتا تعرفه, المشاعر معديه زى الامراض بالظبط, ممكن تحس انك بتساعد واحد بيغرق بس انتا فى الحقيقة بتعجل بخراب بيتك انتا. سعاة المنحوس ده هو الى بيجب النحس لروحه, وهيجبهولك انتا كمان. خليك دايما مع الناس الذيذة ووشها حلو على الناس.

القانون الحادى عشر: اتعلم ازاى تخلى الناس تفضل معتمده عليك

علشان شخصيتك تفضل مستقلة لازم الناس الى حلوليك تفضل عاوزاك ومحتاجاك موش العكس. كل ما الناس يعتمودو عليك اكتر, كل ما تبقى حر اكتر. طول ماهم معتمدين عليك علشان ينبسطو ويقضو وقت حلو طول منتا مطمن وموش خايف. اوعى توعيهم للدرجة الى تخليهم موش محتاجينك تانى

القانون التانى العشر: من فترة للتانية خليك كريم وصريح علشان الناس تديك الامان

حركة واحدة فيها كرم ووضوح تدارى كتير على بلاوى سودة. لانها بتخلى حتى الناس الشكاكة موت تديك الامان. ولما يحصل ده هيبقى ضعفو من ناحيتك, وده هيديك الفرصة تضحك عليهم وتستغلهم. هدية غير متوقعة فى وقت موش محسوب بتعمل نفس التاثير.

حورات لذيذة بعملها وانا خارج مع الحتة بتاعتى

2007-06-12T11:01:00.000-07:00

مساء الفل يا معلمين هقولو على شوية حورات بعملها لما اكون خارج مع حته طرية

1- لما تيجى تسلم عليها بعد ما تسيب ايدك بصلها باستغراب وقولها "هاتى ايدك تانى" لما تمد ايدها علشان تسلم عليك تانى بص على اديها وقول بابتسامه خبيثة شوية "غسلتى ايدك قبل ما تسلمى عليا" غالبا هتضحك ولو واخدين على بعض ممكن تضربك على كتفك.

2- لما تقعدو مع بعض فى كافيه او اى حته بص على الخواتم فى اديها وقول "انتى عارفة البنت الى بتلبس خاتم فى الصباع ده بتبقى ايه..." واسكت شوية علشان تشوقها, روح بعد كده قايلها روتين الخواتم – لو لابسه خاتم فى الابهام تبقى شخصية مستقلة وبتحب تعتمد على نفسها, السبابة شخصية مسيطرة وبتحب تدى اوامر, الوسطى شخصية عنيدة ودماغها ناشفة, البنسر شخصية رومانسية وحساسة "معظم الحريم الى عرفتهم بيلبسو الخاتم فى الصباع ده", الخنصر بتبقى شخصية مهزوزة وبتردد كتير.

3- فى وسط الكلام قولها "حلوة السلسلة ورهالى" كده انتا بتديها حجة علشان تقرب منك, لما ترفعها باديها امسك السلسلة شوية وكلمها عليها جابتها منين ومعناها ايه وكده, كده انتا بتعمل شد جنسى بينك وبينها علشان هيا قريبة منك وايدك قريبة من صدرها, بعد كده قولها بهزار "حلوة السلسلة ديه مسموحلك تلبسيها تانى", لو قلعت السلسلة علشان تورهالك ممكن تعمل عبيط وتطبقها وتحطها فى جيبك, لو طلبتها منك لاعبها وارفع السلسلة فوقيها وكل ما تمد ايدها علشان تاخدها ابعد ايدك واضحك علشان تجر شكلها شوية وتعلى الكميا بينكو.

4- لما توريها الموبيل بتاعك وتفرجها الاغانى الى فيه قولها "اختارى ليه اغنية يا بطة علشان كل ما اسمعها تفكرنى بيكى", لما تروح خلى الاغنية ديه الرنج تون بتاعها, وبعد كده فى الخروجة الجاية قولها فى وسط الكلام "ما ترنى عليا كده" ولما تسمع هيا الرنة متقولش حاجة ابتسم وبص فى عنيها اوى.

5- برده فى وسط الكلام قولها "عارفة يا بطة ايه اكتر تلت حجات عاجبنى فيكى" قولها على حجاتين عاجبينك في تصرفتها, طريقة كلامها, او ستيل لبسها, لما تسالك على التالتة قولها بضحك "طبعا موش هقولك, اكيد بتهزرى" لو قعدت تزن قلها "لما تكبرى هقولك" اغمزلها بعنيك ودور وشك بعيد عنها.

6- لو فى وسط الكلام قالت ليك على خصلة وحشة فيها او حركة وحشة عملتها, بصلها باستغراب, وابعد عنها شوية, واعمل نفسك خايف منها, وقولها بهزار "اه شكلك من النوع المفترس".

الحوارت ديه متجربة اكتر من مرة

يلا باى

9 معتقدات مهمة لازم تثبت فى دماغ اى واحد بيظبط

2007-06-08T12:39:00.000-07:00

مساء الفل يا برنسات, فى كتاب جامد بقرا فيه شوية اليومين دول "التظبيط العملى" بتاع واحد اسمه "سونج كات" الرجل ده معدى ده احسن واحد فى التظبيط على مستوى العالم فى سنة 2006

المهم لو لخصت كتابه فى جمله واحده هتبقى "اتعامل مع البنات الى حوليلك على اساس انت الجايزة موش هما"

من ضمن الافكار الى علقت فى دماغى لما بصيت فى الكتاب بتاعه "الى بتصدقه عن نفسك بتدور على دليل عليه فى الواقع الى حوليك", بمعنى انه لو انتا ان انطباعك عن نفسك ان دمك تقيل, هتفتكر بس كل المواقف الى كان دمك تقيل فيها وتنسى ان سعات انتا قعلا عرفت تضحك اصحابك.

الخلاصة فيه تسع معتقدات لازم تبقى فى دامغك علشان تحس انك فعلا الجايزة, ومتخافش مع الوقت هتلاقى المعتقدات بقت حقيقة لانك بتدور ومركز عليها بس, حاول تراجعهم كل يوم لمدة 3 اسابيع على الاقل علشان تحس بالفرق

1- مهما كان الانطباع ده سخيف معظم الشباب الى بيعرف يظبط بالفطرة, واثق انه هو الجايزة وانه كمان بيعمل جميل فى البنت علشان رضى يقف يتكلم معاها, وهو بيعرف يوصل للبنت الانطباع ده عن نفسه.

2- الشباب دول برده عندهم انطباع ان البنات عندهم رغبة زينا اذا موش كانت اقوى منا, وكمان البنات بيحبو يبسطوهم, مهم يكون الانطباع ده عندك علشان موش تكره البنات, علشان لو انتا كده دلوقتى البنات هتاخد بالها وش من انك بتكرهم مهما حاولت تخبى يا برنس وده موش فى صالحك خالص.

3- برده الشباب الى بيظبط بالفطرة بيصدق انه عارف البنت جسد وروح اكتر من نفسها, طور المعتقد ده عندك

4- مهما كان رد فعل البنت كويس او حش اكيد فى درس جديد اتعلمته من الموقف ده, بمعنى موش تاخد الموقف بشكل شخصى.

5- لما البنت تقول ليك انها موش بتحب حاجة معينة فيك او فى تصرفاتك, فا ده مشكلتها هيا موش انتا, افتكر المعتقد ده لما تخش تكلم واحده

6- مهما كان رد الفعل البنت معاك دلوقتى, هيا لسه عاوزك, كل الى عليك ان تخلق الفرصة الى تخلى حلمها حقيقة

7- انتا موش مستنيها ترضى وتحن عليك, لكن هى علطول بتحاول ترضيك وتخليك تحن عليها

8- معظم البنات عوازة تتعرف عليك الفكرة هل انتا عاوز تتعرف عليهم؟ هل هما فى مستواك وموش هيخيبو ظنك؟

9- هيا الى بتجرى وراك وعاوزة تكسبك, بس انتا بس الى تحدد اذا كنت عاوز تطور علاقتك بيها ولا لاء

خلاص كفاية عليكو كده

اكيد ان شاء الله هكتب مقالات تانية عن الكتاب المعدى ده

تقدرو تمشو دلوقتى